30. október - 6. nóember - Tbl 44
Dysnes hentug staðsetning fyrir líforkugarða
Starfsfólk SSNE og Vistorku hafa unnið ötullega að undirbúningi fyrsta fasa líforkuvers undanfarna mánuði með stuðningi Umhverfis-, orku- og loftslagsráðuneytisins og voru niðurstöður þeirrar vinnu kynntar á Teams-fundi með sveitarstjórnarfólki þann 9. júní síðastliðinn. Á fundinum var sveitarfélögum svæðisins boðið að taka þátt í stofnun þróunarfélags um áframhald verkefnisins og var formlegt boð þess efnis sent á sveitarstjórnir á Norðurlandi eystra. Greint er frá þessu á vef SSNE.
Frumhagkvæmnimat líforkuvers í Eyjafirði var gefið út og kynnt í nóvember á síðasta ári og í kjölfarið fengu allar sveitastjórnir kynningu á verkefninu og hugmyndafræðinni að baki því. Öll aðildarsveitarfélög SSNE voru sammála um að halda áfram vinnu við verkefnið, enda mikilvægt að til sé farvegur fyrir lífrænan úrgang af svæðinu þegar ekki er lengur í boði að urða.
Búið er að brjóta verkefnið upp í fasa þar sem horft er til mismunandi úrgangsstrauma og þess hvaða vanda liggur mest á að leysa. Réttara væri að ræða um líforkugarða með þessari nálgun og verður það hér eftir gert.
Í fyrsta fasa er litið til móttöku og vinnslu dýraleifa, en EFTA dómur hefur fallið á íslenska ríkið vegna þess hve málaflokkurinn er í miklum ólestri hér á landi. Litið var til nýútkomins minnisblaðs Environice um meðhöndlun dýraleifa og þess hvernig nágrannaþjóðirnar leysa þennan vanda, leitað var til sérfræðings á sviðinu til ráðgjafar og lausn teiknuð upp með finnskum ráðgjöfum sem hafa áratugalanga reynslu af uppsetningu vinnslna á dýraleifum. Vinna undanfarinna mánaða hefur einnig falist í þarfagreiningu, útreikningi úrgangsmagns og samtali við hagaðila; landeigendur, stjórnvöld, eftirlitsstofnanir, afurðastöðvar og hagsmunasamtök bænda meðal annars.
Fasi 1 snýr að orkuvinnslu úr dýraleifum (hræjum og áhættuvefum úr afurðastöðvum) þar sem úrgangurinn er malaður í ákveðna kornastærð, settur í þrýstisæfingu og fitupressun. Afurðir vinnslunnar eru í formi fitu sem áfram er hægt að vinna í lífidisil og er mikilvægur orkugjafi á tímum orkuskipta. Þá verður einnig til kjötmjöl sem nota má sem orkugjafa í brennslu. Þessi vinnsluaðferð uppfyllir öll öryggisviðmið og reglugerðir um meðhöndlun áhættuúrgangs. Oft er rætt um að eina leiðin til að losna við þennan úrgang sé brennsla. Sú leið er vissulega lögleg en hún samræmist ekki hugmyndum um hringrásarhagkerfi og er mjög orkufrek.
Áfram er litið til Dysness sem hentugrar staðsetningar fyrir líforkugarðana sem geta byggst upp í kringum fyrsta fasa, en starfsfólks SSNE og Vistorku hafa þegar hafið undirbúningsvinnu við fasa 2 í líforkuverinu sem snýr að vinnslu metans, en vonast er til að sá fasi geti byggst upp samhliða fasa 1. Áhersla verður lögð á samstarf við bændur á svæðinu við næstu skref.
Nýjast
-
Uppskeruhátíð ferðaþjónustunnar á Norðurlandi
Þrjár viðurkenningar voru veittar á Uppskeruhátíð ferðaþjónustunnar á Norðurlandi sem að þessu sinni var haldin í Eyjafirði, í Eyjafjarðarsveit, Svalbarðsstrandarhreppi og Grýtubakkahreppi. Þær voru fyrirtæki ársins, hvatningarverðlaun ársins og fyrir störf í þágu ferðaþjónustu. Á uppskeruhátíðinni var farið í heimsóknir til ýmissa ferðaþjónustufyrirtækja á svæðinu, sem bjóða bæði afþreyingu, mat og gistingu ásamt ýmsu öðru. Hátíðin tókst afar vel og lauk með hátíðarkvöldverði á Laugaborg í Hrafnagilshverfi, kvöldskemmtun, dansi og mikilli gleði. -
Harðbakur málaður og yfirfarinn í Slippnum á Akureyri
Togarinn Harðbakur EA 3 heldur senn til veiða eftir ýmsar endurbætur og uppfærslur í Slippnum á Akureyri, auk þess sem skipið var heilmálað. Harðbakur er fimm ára gamalt skip, smíðað í Vard-Aukra skipasmíðastöðinni í Noregi. Skipið kom til Akureyrar 9. nóvember 2019 og strax í kjölfarið tók Slippurinn við því, þar sem settur var vinnslubúnaður um borð. Harðbakur er 29 metra langur og 12 metra breiður. Skipið er gott í alla staði, bæði hvað varðar vinnslubúnað og aðbúnað áhafnar. -
Tónlistarskóli Eyjafjarðar sá fyrsti sem fer í Græn skref
Tónlistarskóli Eyjarfjarðar hefur náð þeim einstaka áfanga að vera fyrsti tónlistarskólinn á Íslandi til að fara í Græn skref „og mega þau vera stolt af því,“ segir á vefsíðu Samtaka sveitarfélaga á Norðurlandi eystra, SSNE. -
Atkvæðagreiðsla utan kjörfundar hefst 7 nóvember
Atkvæðagreiðsla utan kjörfundar við embætti sýslumannsins á Norðurlandi eystra hefst 7. nóvember n.k. Alls hafa 31.039 atkvæðarétt í kjördæminu, flestir þeirra og það kemur ekki á óvart frá Akureyri eða 15.057 manns. -
Pólarhestar eru fyrirtæki ársins
Markaðsstofa Norðurlands veitir viðurkenninguna Fyrirtæki ársins til fyrirtækis sem er búið að slíta barnsskónum og hefur skapað sér sterka stöðu á markaði. Fyrirtækið hefur unnið að stöðugri uppbyggingu, vöruþróun og nýsköpun og er með höfuðstöðvar á Norðurlandi. -
Íslenska kerfið framleiðir afbrotamenn
Að refsa einstaklingi fyrir alvarleg afbrot með fangelsisvist, er eitthvað sem flestir geta verið sammála um að sé nauðsynlegt. Fæstir átta sig hins vegar á hve frelsissviptingin ein og sér hefur gríðarleg áhrif á einstakling sem dæmdur hefur verið til vistar í fangelsi og ef betrunarúrræðin eru ekki til staðar er næsta öruggt að sá einstaklingur er lýkur afplánun, kemur út í samfélagið aftur í verra ástandi en hann var í þegar afplánun hófst. Stundum held ég að þessi hópur samfélags okkar sé álitinn hin skítugu börn Evu sem flestir vita af en enginn vill af þeim vita. Eins og að vandamálin hverfi um leið og kveðinn er upp dómur. Allir þeir einstaklingar sem fá á sig dóma eru synir, dætur, bræður, systur og barnabörn einhverra. Að afplána dóm hefur ekki bara gríðarleg áhrif á fangann heldur líka hans nánustu aðstandendur sem ég tel vera algjörlega týndan hóp innan kerfisins. Kerfis sem fyrir löngu er molnað í sundur. Kerfi sem nær ekki að eiga samskipti. Kerfi sem þarf að taka alvarlega til í og snýst hreinlega um líf eða dauða fólksins okkar. -
KOSNINGARÉTTUR
Við vanmetum oft það sem þykir sjálfsagt! Árið 1843 rak kosningaréttur fyrst á fjörur okkar Íslendinga með tilskipun Kristjáns VIII, en eingöngu til karlmanna eldri en 25 ára sem áttu jörð. Það var um 2% íslensku þjóðarinnar. Árið 1857 var ekki lengur þörf á að eiga jörð, nægjanlegt að búa á eigin heimili og borga skatta. Konur virtust ekki vera landsmenn á þessum tíma. -
Afleitt að Sæfari verði í slipp í apríl
Grímseyingar óska eftir aðstoð við að fá aðra tímasetningu en nú er þegar fyrirhugað er að ferjan Sæfari sem siglir milli lands og eyjar fer í slipp, sem er „afleit tímasetning bæði hvað varðar sjávarútveg og sérstaklega slæmt fyrir ferðaþjónustu í eynni,.“ segir í bókun frá íbúafundi sem haldinn var í eyjunni. -
Framkvæmdir að hefjast við innisundlaugina
Framkvæmdir eru hafnar við talsvert umfangsmiklar breytingar á innisundlaugin í Sundlaug Akureyrar. Umhverfis- og mannvirkjaráð hefur samþykkt að taka lægstu tilboðum í lagnir, raflagnir og múrverk en hafnaði aftur á móti tilboðum sem bárust í útboði á verkefnum í húsasmíði og blikksmíði þar sem þau voru hátt yfir kostnaðaráætlun.
