30. október - 6. nóember - Tbl 44
Grófin geðrækt föst í óviðunandi húsnæði
mth@vikubladid.is
Ítrekað og um árabil hefur verið óskað eftir því að Akureyrarbær geri þjónustusamning við Grófina geðrækt og styrki starfsemina fjárhagslega. Slík beiðni var síðast tekin fyrir hjá velferðarráði nú fyrir skömmu og var henni vísað áfram til vinnu við gerð fjárhagsáætlunar. Starfsemi Grófarinnar hófst árið 2013 og hefur á ríflega áratug sannað gildi sitt sem mikilvægur vettvangur fyrir fólk sem glímir við geðraskanir.
Pálína Sigrún Halldórsdóttir framkvæmdastjóri og iðjuþjálfi hjá Grófinni geðrækt segir að Grófin hafi stóst eftir þjónustusamningi við Akureyrarbæ frá árinu 2015 en ekki gengið. Í fyrrahaust kom upp vandi vegna húsnæðismála Grófarinnar sem leigir húsnæði í Hafnarstræti 95 í miðbæ Akureyrar. „Sá vandi varð til þess að við reyndum að knýja á um aukið fjármagn og sendum við inn erindi til bæjarins þar sem við annars vegar óskuðum eftir þjónustusamningi til að mæta aukinni aðsókn í Grófina og hins vegar óskuðum við eftir aðstoð til að leysa úr húsnæðisvandanum,“ segir Pálína. Því miður er ekki nýtt húsnæði í sjónmáli og segir hún þá fátt til ráða annað en að farið verði í lagfæringar á núverandi húsnæði en það kosti verulega fjármuni. „Það myndi hjálpa ef bærinn gerði við okkur þjónustusamning og/eða samþykkti að veita okkurrekstrarstyrk svo ekki þurfi að skera þjónustuna niður til að eiga fyrir dýrari leigu. „Það er heldur ekki góður kostur að fækka stöðugildum til að laga húsnæðið á sama tíma og aðsókn eykst.
Gömul, úrelt og óheilnæm efni í húsinu
Húsið er í eigu Fasteignafélagsins Reita og var reynt að fá félagið til að ráðast í aðkallandi viðgerðir. Stór hluti húsnæðisins er með lélega eða enga loftræstingu og mikið er um gömul, úrelt og óheilnæm efni í húsinu. „Það er alls ekki í boði að mínu mati að fólki úr viðkvæmustu hópum þjóðfélagsins sé boðið upp á aðstöðu af þessu tagi,“ segir Pálína. Hún segir að víða hafi verið leitað eftir nýju húsnæði, en ekkert rekið á fjörurnar enn, hvorki tímabundið né varanlegt. Reitir hafa tilkynnt að húsaleiga hækki um ríflega 100% frá núverandi leiguverði eða ríflega 3 milljónir, verði farið í nauðsynlegar endurbætur og það sé ljóst að Grófin hafi ekki fjárhagslegt svigrúm til að standa undir þeim hækkunum nema til komi aukið fjármagn eða að þjónustan verði skert.
Erfið og snúin staða
„Þetta er mjög erfið og snúin staða, málið vinnst hægt, við höfum leitað ýmissa leiða
en okkur er gjarnan vísað áfram eitthvað annað og biðin eftir lausn lengist,“ segir Pálína. Bærinn hafi ekki verið viljugur að skrifa undir þjónustusamning með ákveðnu fjárframlagi til Grófarinnar fram til þessa og borið því við að lögum samkvæmt væri málaflokkurinn undir hatti ríkisins. Pálína segir fordæmi fyrir því að sveitarfélög styrki starfsemi af svipuðu tagi, m.a. veiti Reykjavíkurborg Hugarafli rekstrarstyrk en einnig sé velferðarsvið Reykjavíkurborgar með þjónustusamning við þau. Fleiri úrræði megi nefna svo sem Hlutverkasetur og Bergið headspace sem einnig njóti styrkja frá sveitarfélögum. Grófin hefur fengið styrki frá ríkinu og árið 2020 var fyrsta árið sem félags- og heilbrigðisráðuneyti veitti Grófinni fé af aukafjárlögum. Árið 2021 var gerður þriggja ára samningur við ráðuneytið. Vinnumálastofun hefur verið með þjónustusamning við Grófina frá árinu 2015 er enn í gildi þjónustusamningur þeirra á milli.
Ómetanlegt öryggisnet
Grófin er opið og gjaldfrjálst úrræði þar sem fólk með reynslu af vanda af geðrænum toga, aðstandendur og fagfólk sem starfað hefur við geðheilbrigðisþjónustu vinnur saman. Unnið er út frá hugmyndafræði valdeflingar, bata og jafningjanálgunar. Grófin geðrækt hefur sinnt ýmsum verkefnum, sem tengjast fræðslu og forvörnum og má þarf nefna Virkið Ungmennahús, Vinnuskólann, geðfræðslu í skólum og hópliðveislu „Það er þörf fyrir úrræði af þessu tagi í okkar samfélagi, opinn og ókeypis stað þar sem fólk getur komið saman. Grófin er öflugt stuðningssamfélag fólks sem er til staðar hvert fyrir annað þegar á reynir og þau tengsl sem hér myndast og vinátta er mörgum ómetanlegt öryggisnet.
Nýjast
-
Harðbakur málaður og yfirfarinn í Slippnum á Akureyri
Togarinn Harðbakur EA 3 heldur senn til veiða eftir ýmsar endurbætur og uppfærslur í Slippnum á Akureyri, auk þess sem skipið var heilmálað. Harðbakur er fimm ára gamalt skip, smíðað í Vard-Aukra skipasmíðastöðinni í Noregi. Skipið kom til Akureyrar 9. nóvember 2019 og strax í kjölfarið tók Slippurinn við því, þar sem settur var vinnslubúnaður um borð. Harðbakur er 29 metra langur og 12 metra breiður. Skipið er gott í alla staði, bæði hvað varðar vinnslubúnað og aðbúnað áhafnar. -
Tónlistarskóli Eyjafjarðar sá fyrsti sem fer í Græn skref
Tónlistarskóli Eyjarfjarðar hefur náð þeim einstaka áfanga að vera fyrsti tónlistarskólinn á Íslandi til að fara í Græn skref „og mega þau vera stolt af því,“ segir á vefsíðu Samtaka sveitarfélaga á Norðurlandi eystra, SSNE. -
Atkvæðagreiðsla utan kjörfundar hefst 7 nóvember
Atkvæðagreiðsla utan kjörfundar við embætti sýslumannsins á Norðurlandi eystra hefst 7. nóvember n.k. Alls hafa 31.039 atkvæðarétt í kjördæminu, flestir þeirra og það kemur ekki á óvart frá Akureyri eða 15.057 manns. -
Pólarhestar eru fyrirtæki ársins
Markaðsstofa Norðurlands veitir viðurkenninguna Fyrirtæki ársins til fyrirtækis sem er búið að slíta barnsskónum og hefur skapað sér sterka stöðu á markaði. Fyrirtækið hefur unnið að stöðugri uppbyggingu, vöruþróun og nýsköpun og er með höfuðstöðvar á Norðurlandi. -
Íslenska kerfið framleiðir afbrotamenn
Að refsa einstaklingi fyrir alvarleg afbrot með fangelsisvist, er eitthvað sem flestir geta verið sammála um að sé nauðsynlegt. Fæstir átta sig hins vegar á hve frelsissviptingin ein og sér hefur gríðarleg áhrif á einstakling sem dæmdur hefur verið til vistar í fangelsi og ef betrunarúrræðin eru ekki til staðar er næsta öruggt að sá einstaklingur er lýkur afplánun, kemur út í samfélagið aftur í verra ástandi en hann var í þegar afplánun hófst. Stundum held ég að þessi hópur samfélags okkar sé álitinn hin skítugu börn Evu sem flestir vita af en enginn vill af þeim vita. Eins og að vandamálin hverfi um leið og kveðinn er upp dómur. Allir þeir einstaklingar sem fá á sig dóma eru synir, dætur, bræður, systur og barnabörn einhverra. Að afplána dóm hefur ekki bara gríðarleg áhrif á fangann heldur líka hans nánustu aðstandendur sem ég tel vera algjörlega týndan hóp innan kerfisins. Kerfis sem fyrir löngu er molnað í sundur. Kerfi sem nær ekki að eiga samskipti. Kerfi sem þarf að taka alvarlega til í og snýst hreinlega um líf eða dauða fólksins okkar. -
KOSNINGARÉTTUR
Við vanmetum oft það sem þykir sjálfsagt! Árið 1843 rak kosningaréttur fyrst á fjörur okkar Íslendinga með tilskipun Kristjáns VIII, en eingöngu til karlmanna eldri en 25 ára sem áttu jörð. Það var um 2% íslensku þjóðarinnar. Árið 1857 var ekki lengur þörf á að eiga jörð, nægjanlegt að búa á eigin heimili og borga skatta. Konur virtust ekki vera landsmenn á þessum tíma. -
Afleitt að Sæfari verði í slipp í apríl
Grímseyingar óska eftir aðstoð við að fá aðra tímasetningu en nú er þegar fyrirhugað er að ferjan Sæfari sem siglir milli lands og eyjar fer í slipp, sem er „afleit tímasetning bæði hvað varðar sjávarútveg og sérstaklega slæmt fyrir ferðaþjónustu í eynni,.“ segir í bókun frá íbúafundi sem haldinn var í eyjunni. -
Framkvæmdir að hefjast við innisundlaugina
Framkvæmdir eru hafnar við talsvert umfangsmiklar breytingar á innisundlaugin í Sundlaug Akureyrar. Umhverfis- og mannvirkjaráð hefur samþykkt að taka lægstu tilboðum í lagnir, raflagnir og múrverk en hafnaði aftur á móti tilboðum sem bárust í útboði á verkefnum í húsasmíði og blikksmíði þar sem þau voru hátt yfir kostnaðaráætlun. -
Nytjamarkaður Norðurhjálpar er eins árs
„Þetta var dásamlegur dagur og við erum þakklátar öllu því góða fólki sem styður við bakið á okkur, við erum eiginlega alveg vissar um að við er með langbesta fólki í kringum okkur,“ segir Sæunn Ísfeld Guðmundsdóttir ein þeirra fjögurra kvenna sem reka nytjamarkaðinn Norðurhjálp.
