Páskakveðja frá bæjarstjóra
Ásthildur Sturludóttir bæjarstjóri á Akureyri ritar páskahugleiðingu á vef bæjarins og birtum við skrifin hér að neðan.
Ég kveiki á kertum mínum við krossins helga tré, orti Davíð Stefánsson frá Fagraskógi í kvæði sínu um föstudaginn langa. Tregafullt lagið sem Guðrún Böðvarsdóttir frá Hrafnseyri við Arnarfjörð samdi við kvæðið, lyftir orðum Davíðs á æðra stig og fyllir páskana af helgi og þökk fyrir lífið.
Þakklætið er í mínum huga mikil dygð og ég þreytist seint á því að lofa og þakka fyrir þá staðfestu og þrautseigju sem þið öll, starfsfólk Akureyrarbæjar og fólkið í framvarðalínunni, hafið sýnt í þeim erfiðu aðstæðum sem nú hafa sett tilveru okkar á hvolf. Öll erum við eins og lítil en ómissandi tannhjól í risastóru gangverki sem kallast samfélag og heldur okkur saman. Nú þegar vágesturinn mikli virðist ætla að láta undan síga, seytlar inn ómælt þakklæti, sigurvissa og trú á mannsandann. Við getum þetta saman.
Öll heimsbyggðin er sem lömuð. Framundan eru þrengingar sem samfélag þjóðanna mun þó með samtakamætti sigrast á. Allir þurfa að leggja sitt lóð á vogarskálarnar og Akureyrarbær lætur ekki sitt eftir liggja. Í aðgerðaráætlun sveitarfélagsins til að mæta afleiðingum þess faraldurs sem nú geisar, er gert ráð fyrir 4,4 milljörðum króna í ýmsar framkvæmdir á þessu ári. Fyrr í vikunni var tekin fyrsta skóflustungan að nýjum leikskóla í bænum og með ýmsum öðrum aðgerðum munum við komast fljótt aftur á réttan kjöl. Við munum flýta ýmsum viðhaldsverkefnum og liðka fyrir framkvæmdum í samvinnu við ríkið. Þar eru í farvatninu risastór verkefni á borð við stækkun flugstöðvarinnar okkar, nýtt hjúkrunarheimili og tvær nýjar heilsugæslustöðvar. Allt verður gert til að halda hjólum atvinnulífsins í sveitarfélaginu gangandi og vonandi verður hægt að lágmarka skaðann.
Heimsfaraldurinn sem kenndur er við Covid-19, minnir um margt á spænsku veikina svokölluðu sem herjaði á Ísland árið 1918 og sömuleiðis berklana sem lögðu allt of marga Íslendinga að velli um svipað leyti. Guðrún Böðvarsdóttir, sem samdi lagið við kvæði Davíðs frá Fagraskógi, varð berklum að bráð aðeins 34 ára gömul. Veikt brjóst hennar hefur fyllst af þakklæti fyrir sitt stutta líf þegar hún las kvæði Davíðs og til varð hið harmþrungna en fallega lag.
Með síðasta erindi úr kvæði Davíðs „Á föstudaginn langa" vil ég þakka ykkur öllum fyrir trúmennsku og eljusemi við að knýja áfram samfélagið okkar.
Ég fell að fótum þínum
og faðma lífsins tré.
Með innri augum mínum
ég undur mikil sé.
Þú stýrir vorsins veldi
og verndar hverja rós.
Frá þínum ástareldi
fá allir heimar ljós.
Ég óska ykkur öllum og fjölskyldum ykkar gleðilegra páska. Takk!
-Ásthildur Sturludóttir, bæjarstjóri á Akureyri
Nýjast
-
AtNorth stækkar gagnaver sitt á Akureyri Glatvarmi nýttur til matvælaframleiðslu
Fyrirtækið atNorth vinnur að stækkun gagnavers síns á Akureyri. Einnig hefur félagið kynnt nýtt samstarf um endurheimt og nýtingu varma. Stækkun tveggja gagnavera atnorth, á Akureyri og í Reykjanesbæ er þegar hafin. -
easyJet lengir flugtímabil frá London til Akureyrar
Breska flugfélagið easyJet tilkynnti í dag að það muni bæta við flugferðum frá London Gatwick til Akureyrar í apríl 2025, og í október 2025. Áður stóð til að fljúga út mars á næsta ári, og hefja flugin að nýju í nóvember. Flugfélagið verður því mánuði lengur með flug í boði þennan vetur og að auki næsta haust. -
Snjómokstur í bænum
Töluvert hefur snjóað í bænum um helgina og þennan mánudagsmorguninn er víða illfært um íbúðagötur og stíga. Unnið er að snjómokstri og er mikill fjöldi tækja í notkun á vegum sveitarfélagsins og verktaka. -
Íþróttir fyrir alla!
Hver króna sem fer til íþróttafélaga er króna sem skilar sér margfalt til baka í samfélagið. Um kosti íþróttastarfs á Íslandi verður ekki deilt. Starfið er faglegt, fjölbreytt og gott. Það sem hefur breyst á undanförnum árum er að íþróttir eru gríðarlega atvinnuskapandi. Félögin á Íslandi í dag eru orðin stærri og komin með fleiri starfsmenn í full störf. Ásamt því að afleidd störf tengd íþróttum á Íslandi, t.d. í ferðaþjónustu, eru orðin ansi mörg og drjúg. -
Hið fullkomna stjórnarfar
Mannkynið hefur gert tilraunir með margskonar stjórnarfar. Þetta lærdómsferli hefur því miður kostnað blóð og mannfórnir en það hefur fært okkur vitneskjuna um að lýðræði er besta stjórnarfarið sem mannkynið hefur þekkt. Ekkert stjórnskipulag hefur fært mannkyni jafn miklar framfarir, öryggi, réttlæti og almenna hagsæld en lýðræðið. -
Hættum að slá ryki í augun á fólki !
Greinin er skrifuð í nafni Stangaveiðifélags Akureyrar, Stangaveiðifélagsins Flúða, Veiðifélags Fnjóskár, Veiðifélags Eyjafjarðarár, Veiðifélags Hörgár, Fiskirannsókna ehf, félagsskapar sem kallast Bleikjan - Styðjum stofninn, SUNN - Samtaka um náttúruvernd á Norðurlandi, Landssambands veiðifélaga, NASF – Verndarsjóðs villtra laxastofna og Íslenska náttúruverndarsjóðsins – IWF. -
Eldri borgarar hafa áhyggjur af öryggismálum í Sölku
Fulltrúar í Félagi Eldri borgara á Akureyri hafa lýst yfir áhyggjum sínum af öryggismálum í kjallara félagsmiðstöðvarinnar Sölku í Víðilundi á Akureyri. Þeir hvetja til þess að vinnueftirlit, heilbrigðiseftirlit og eldvarnareftirlit verði fengið til að gera heildarúttekt á húsnæðinu vegna þeirrar starfsemi sem þar fer fram á vegum Akureyrarbæjar. -
Gestir í Lystigarði um 159 þúsund á 10 mánuðum
Alls heimsóttu rúmlega 159 þúsund gestir í Lystigarðinni á Akureyri á 10 mánaða tímabili, frá byrjun janúar til loka október samkvæmt teljurum sem þar eru. Þetta kemur fram í minnisblaði sem fjallað var um á fundi umhverfis- og mannvirkjaráðs. -
Sólveig Lára er Ungskáld Akureyrar 2024
Það var vel við hæfi að í dag, á degi íslenskrar tungu, voru úrslit í ritlistakeppni Ungskálda 2024 kunngjörð á Amtsbókasafninu. Fyrstu veðlaun hlaut Sólveig Lára Skarphéðinsdóttir fyrir verkið Stök.
