Ósátt við skort á samráði vegna framtíðaruppbyggingar
Íþróttafélagið Þór hefur sent erindi til bæjaryfirvalda á Akureyri þar sem kallað er eftir samráði við framtíðaruppbyggingu á félagssvæði Þórs og þar verði tillit tekið til þarfa félagsins, væntanlegrar íbúaþróunar á félagssvæðinu og eflingar íþróttakjarna í samræmi við stefnu Akureyrarbæjar og ÍBA.
Félagið er ósátt við að aðalskipulaginu hafi verið breytt án samráðs við Þór og segja að þær hugmyndir sem nú séu uppi kollvarpi framtíðarhugmynd félagsins. Í grein sem birtist á vef Þórs nýlega segir að fyrir rúmu ári síðan hafi félagið skipað nefnd varðandi nýtt deiliskipulag er lýtur að þéttingu byggðar í nágrenni Þórsvallar og samþykkta íþróttastefnu bæjarins þar sem lögð verði áhersla á færri og stærri íþróttakjarna í bænum. Segir í greininni að bæjaryfirvöld hafi takið vel í hugmyndir Þórs og loforð legið fyrir um að tillögurnar yrðu teknar til efnislegrar skoðunar og samráð yrði haft við íþróttafélagið um framtíðarskipulag svæðisins.
Nýr leikskóli kollvarpar framtíðarhugmyndum
Ein af þeim hugmyndum sem settar voru fram í framtíðarsýn Þórs var að nýr leikskóli yrði sambyggður austurálmu Glerárskóla enda myndi sú staðsetning ekki spilla íþróttasvæðinu til frambúðar. Einnig, að vestan og sunnan við núverandi íþróttahús yrði svo gert ráð fyrir nýju íþróttahúsi og yfirbyggðri 50 metra sundlaug. Nú hafi hins vegar skipulagsráð kynnt tillögu að breytingu á aðalskipulagi Akureyrar 2018-2030, sem felur í sér stækkun á lóð Glerárskóla. Í tillögunni er gert ráð fyrir byggingu leikskóla á tveimur hæðum sunnan við núverandi íþróttahús. „Verði af byggingu leikskóla á þeim stað sem skipulagsráð setur fram er ljóst að hugmyndir um byggingu nýs íþróttahúss og sundlaugar eru að engu orðnar og í raun kollvarpar þeim framtíðarhugmyndum sem verkefnahópur Þórs setti fram.
Íþróttafélagið Þór sá tækifæri í að svæði félagsins gæti stækkað og auka mætti samnýtingu mannvirkja Þórs og Glerárskóla,“ segir í greininni.
Vonbrigði fyrir félagið
Ingi Björnsson, formaður Þórs, segir í samtali við Vikudag að þessi tillaga að aðalskipulagi sé vonbrigði fyrir félagið. „Við gerðum heildstæða tillögu af svæðinu og héldum að Akureyrarbær væri að vinna með það skipulag í huga. En svo kemur í ljós þegar bærinn auglýsir aðalskipulagið að nýr leikskóli er kominn inn á þetta skilgreinda íþróttasvæði og það breytir þessu talsvert mikið,“ segir Ingi. „Því miður hefur bærinn ekki haft neitt samráð við okkur um þetta mál. Það skipulag sem Akureyrarbær er að vinna að núna er ekki í samræmi við það sem búið var að vinna hjá félaginu og við töldum að væri góður vilji hjá bæjaryfirvöldum með.“
Stórt mál til framtíðar litið
Ingi segir þetta stórt mál þegar til framtíðar er litið. „Það eru áform um að byggja mikið Glerárþorpi á næstu árum og félagið þarf að vera með einhverja stefnu um hvernig það ætlar að mæta því ef íbúum fjölgar ört. Þannig að okkur finnst það vera stórmál ef það er þrengt að svæðinu án þess að það sé gert í sátt við okkur. Okkur finnst að þarna sé bærinn að vinna á skjön við annað. Þá hefur ÍBA og Frístundaráð verið að vinna að því að koma íþróttafélögunum saman í stærri og sterkari kjarna og þessar tillögur ganga einnig þvert á þá hugmynd með því að skerða svæðið hjá Þór, sem einmitt á að vera einn þessara kjarna,“ segir Ingi.
Nýjast
-
Búsetutengd mismunun í heilbrigðisþjónustu, í boði einkavæðingar og heilbrigðisráðherra Framsóknar.
Búsetutengdur munur á notkun þjónustu sérgreinalækna er mjög mikill. Íbúar dreifbýlis nota þjónustuna mun minna en höfuðborgarbúar og íbúar Vestfjarða og Austfjarða minnst allra, nefnilega þrisvar sinnum minna en höfuðborgarbúar. Lýðheilsuvísar benda ekki til þess að íbúar í dreifbýli séu heilsubetri en höfuðborgarbúar. Nærtæk skýring á þessum mun er að kaupandi þjónustunnar, ríkið, lætur sig engu varða hvar þjónustan er veitt og hún hefur nær öll byggst upp í Reykjavík. Í versta falli er afleiðingin sú að þau sem búa næst þjónustunni nýta hana umfram þörf og hin sem fjær búa minna en æskilegt væri. Hvoru tveggja er hættulegt og brýnt að rýna lög og hvort þeim er fylgt. -
Svik við launafólk: Loforð um samráð brotin með gegndarlausum gjaldskrárhækkunum
Anna Júlíusdóttir formaður Einingar Iðju skrifar bréf til bæjarstjórnar Akureyrar í dag sem birt er að heimasíðu félagsins, það lætur hún í ljós mikla óánægju með boðaðar hækkanir hjá hinum ýmsu fyrirtækjum og stofnunum bæjarins og er óhætt að segja að Önnu sé misboðið. „Við erum tilbúin til uppbyggilegs samtals,“ sögðum við í júlí þegar bæjaryfirvöld á Akureyri boðuðu breytingar á gjaldskrám. Við fögnuðum loforðum um samráð, um víðtækt samtal við hagsmunaaðila og um reglulegt endurmatsferli þar sem allir kæmu að borðinu. Nú aðeins fjórum mánuðum síðar stendur eftir sársaukafullt svik á trausti launafólks. Í stað samtals og samráðs virðast vera að raungerast víðtækar gjaldskrárhækkanir sem eru hrein árás á kaupmátt launafólks. -
Vegamálin liggja þungt á Grímseyingum
Vegamál liggja þungt á heimamönnum í Grímsey. Bundið slitlag var sett á götur þar árið 1994 og aftur árið 2014, en þá var verkið ekki klárað almennilega, „því það mátti bara setja á ákveðið marga kílómetra,“ eins og það er orðað í bókun hverfisnefndar. -
Gripmælar, róbótar og ratleikur á Opnum degi Um 300 framhaldsskólanemendur lögðu leið sína í Háskólann á Akureyri
Stuðið var gífurlegt á dögunum þegar um 300 framhaldsskólanemendur heimsóttu Háskólann á Akureyri á Opnum degi. Skólinn hefur gert þetta í mörg ár í góðu samstarfi við náms- og starfsráðgjafa í framhaldsskólum á norðaustursvæðinu. -
Óska eftir frambjóðendum sem eru tilbúnir í alvöru breytingar!
Ég óska eftir breytingum svo að ég og allir aðrir menntaðir Heilsunuddarar viti hvað við eigum að kjósa í komandi alþingiskosningum. -
Lítið að frétta í lífi án frétta á landsbyggðunum
Af þeim 27 fjölmiðlum sem hlutu rekstrarstuðning til einkarekinna fjölmiðla 2024 voru 13 staðbundnir fjölmiðlar og af þeim 10 staðsettir utan höfuðborgarsvæðisins. Hver og einn af þessum staðbundnu miðlum þjónar gríðarlega mikilvægu hlutverki í sinni heimabyggð og styrkveitingin því sannarlega fagnaðarefni. -
AtNorth stækkar gagnaver sitt á Akureyri Glatvarmi nýttur til matvælaframleiðslu
Fyrirtækið atNorth vinnur að stækkun gagnavers síns á Akureyri. Einnig hefur félagið kynnt nýtt samstarf um endurheimt og nýtingu varma. Stækkun tveggja gagnavera atnorth, á Akureyri og í Reykjanesbæ er þegar hafin. -
easyJet lengir flugtímabil frá London til Akureyrar
Breska flugfélagið easyJet tilkynnti í dag að það muni bæta við flugferðum frá London Gatwick til Akureyrar í apríl 2025, og í október 2025. Áður stóð til að fljúga út mars á næsta ári, og hefja flugin að nýju í nóvember. Flugfélagið verður því mánuði lengur með flug í boði þennan vetur og að auki næsta haust. -
Snjómokstur í bænum
Töluvert hefur snjóað í bænum um helgina og þennan mánudagsmorguninn er víða illfært um íbúðagötur og stíga. Unnið er að snjómokstri og er mikill fjöldi tækja í notkun á vegum sveitarfélagsins og verktaka.
