13.nóvember - 20.nóvember - Tbl 46
Nýtt sameinað blað
Vikudagur og Skarpur sameinast í Vikublaðið.
Í næstu viku verður breyting á útgáfustarfsemi Ásprents þegar Vikudagur og Skarpur sameinast í nýtt blað undir heitinu Vikublaðið. Þetta eru því síðustu blöðin undir heitinu Vikudagur og Skarpur. Með þeim lýkur áralangri sögu þessara blaða. Áskrifendur Vikudags og Skarps fá því nýtt blað inn um lúguna næstkomandi fimmtudag. Vikublaðið verður einnig fáanlegt í lausasölu í öllum helstu verslunum. Þá mun nýr vefur opna samhliða, www.vikubladid.is.
Ritstjóri nýja blaðsins verður Þröstur Ernir Viðarsson sem hefur ritstýrt Vikudegi frá árinu 2014 og með honum verða vanir blaðamenn á Akureyri og Húsavík sem munu fjalla um allt það helsta á svæðinu.
Þetta eru sannarlega tímamót í útgáfu fjölmiðils á Norðurlandi með spennandi og krefjandi áskorunum. Óhætt er að fullyrða að með sameiningu blaðanna felast mörg tækifæri í fjölmiðlun. Fleiri pennar munu koma að blaðinu sem þýðir fleiri sjónarhorn og fjölbreyttari efnistök. Lesendum til góða. Hið nýja blað mun stokka upp efnistökin og kynna nýja liði til leiks næstu vikur og mánuði. Blaðinu verður ekkert óviðkomandi og mun leitast eftir því að segja fréttir af málefnum líðandi stundar. Það er ekkert launungarmál að fjölmiðlar almennt berjast í bökkum rekstrarlega. En gildi ritstýrðra fjölmiðla á tímum netvæðingar og samfélagsmiðla er ótvírætt og mikilvægt að þeir haldi velli og séu sem fjölbreyttastir. Staðarmiðlar gegna ákaflega mikilvægu hlutverki í fjölmiðlaflórunni. Þeir eru vettvangur fyrir umræðu í nærsamfélaginu, fjalla um málefni líðandi stundar, hvort sem það eru fréttir, mannlíf eða menning.
Landsdekkandi miðlar einblína oft um of á höfuðborgarsvæðið og því er mikilvægt að staðarmiðlar séu til staðar til að fylla upp í það gap sem landsmiðlar skilja eftir. Rannsóknir hafa líka sýnt að fólk sem nýtir sér staðarmiðla er meira upplýst um nærsamfélagið og þar af leiðandi líklegra til að taka virkan þátt í samfélaginu. Fjölmiðlar eiga að endurspegla samfélagið og til að lesendur fái sem réttustu myndina af nærsamfélaginu þurfa staðarmiðlar að fjalla bæði um það sem vel er gert og einnig það sem miður fer í samfélaginu. Rauði þráðurinn í hinu nýja blaði verður: Fréttir, mannlífsefni, viðtöl, menning og íþróttir.
Við sem stöndum að Vikublaðinu trúum því að fjölmiðlar á landsbyggðinni eigi framtíðina fyrir sér og leggjum af stað í þetta ferðalag full bjartsýni. Við ætlum að leggja okkur af mörkum í að halda fólki á svæðinu upplýstu og veita því upplýsingar og skemmtilegt lesefni um það helsta sem er á döfinni í Eyjafirði og Þingeyjarsýslum. Blaðið tekur fúslega við aðsendum greinum og hægt verður að senda ábendingar og fréttaskot á netfangið vikubladid@vikubladid.is
-Þröstur Ernir Viðarsson ritstjóri Vikudags og Jóhannes Sigurjónsson ritstjóri Skarps
Nýjast
-
Snjómokstur í bænum
Töluvert hefur snjóað í bænum um helgina og þennan mánudagsmorguninn er víða illfært um íbúðagötur og stíga. Unnið er að snjómokstri og er mikill fjöldi tækja í notkun á vegum sveitarfélagsins og verktaka. -
Íþróttir fyrir alla!
Hver króna sem fer til íþróttafélaga er króna sem skilar sér margfalt til baka í samfélagið. Um kosti íþróttastarfs á Íslandi verður ekki deilt. Starfið er faglegt, fjölbreytt og gott. Það sem hefur breyst á undanförnum árum er að íþróttir eru gríðarlega atvinnuskapandi. Félögin á Íslandi í dag eru orðin stærri og komin með fleiri starfsmenn í full störf. Ásamt því að afleidd störf tengd íþróttum á Íslandi, t.d. í ferðaþjónustu, eru orðin ansi mörg og drjúg. -
Hið fullkomna stjórnarfar
Mannkynið hefur gert tilraunir með margskonar stjórnarfar. Þetta lærdómsferli hefur því miður kostnað blóð og mannfórnir en það hefur fært okkur vitneskjuna um að lýðræði er besta stjórnarfarið sem mannkynið hefur þekkt. Ekkert stjórnskipulag hefur fært mannkyni jafn miklar framfarir, öryggi, réttlæti og almenna hagsæld en lýðræðið. -
Hættum að slá ryki í augun á fólki !
Greinin er skrifuð í nafni Stangaveiðifélags Akureyrar, Stangaveiðifélagsins Flúða, Veiðifélags Fnjóskár, Veiðifélags Eyjafjarðarár, Veiðifélags Hörgár, Fiskirannsókna ehf, félagsskapar sem kallast Bleikjan - Styðjum stofninn, SUNN - Samtaka um náttúruvernd á Norðurlandi, Landssambands veiðifélaga, NASF – Verndarsjóðs villtra laxastofna og Íslenska náttúruverndarsjóðsins – IWF. -
Eldri borgarar hafa áhyggjur af öryggismálum í Sölku
Fulltrúar í Félagi Eldri borgara á Akureyri hafa lýst yfir áhyggjum sínum af öryggismálum í kjallara félagsmiðstöðvarinnar Sölku í Víðilundi á Akureyri. Þeir hvetja til þess að vinnueftirlit, heilbrigðiseftirlit og eldvarnareftirlit verði fengið til að gera heildarúttekt á húsnæðinu vegna þeirrar starfsemi sem þar fer fram á vegum Akureyrarbæjar. -
Gestir í Lystigarði um 159 þúsund á 10 mánuðum
Alls heimsóttu rúmlega 159 þúsund gestir í Lystigarðinni á Akureyri á 10 mánaða tímabili, frá byrjun janúar til loka október samkvæmt teljurum sem þar eru. Þetta kemur fram í minnisblaði sem fjallað var um á fundi umhverfis- og mannvirkjaráðs. -
Sólveig Lára er Ungskáld Akureyrar 2024
Það var vel við hæfi að í dag, á degi íslenskrar tungu, voru úrslit í ritlistakeppni Ungskálda 2024 kunngjörð á Amtsbókasafninu. Fyrstu veðlaun hlaut Sólveig Lára Skarphéðinsdóttir fyrir verkið Stök. -
Á að vera landbúnaður á Íslandi?
Þetta er grundvallarspurning sem allir íslendingar þurfa að gera upp við sig ásamt þeirri spurningu hvort byggð eigi yfir höfuð að haldast annars staðar en á sv-horninu. Með ríkjandi borgríkisstefnu síðustu ára í boði Sjálfstæðisflokks, Framsóknarflokks og Vinstri grænna hefur það skilað 85% þjóðarinnar á eitt horn landsins. -
50 ára afmælisfagnaður Geðverndarfélags Akureyrar
Geðverndarfélag Akureyrar hélt upp á 50 ára afmæli sitt nýverið, en félagið var stofnað þann 15. desember 1974. Um 50 manns mættu í fagnaðinn, hlýddu á fróðleg erindi, nutu lifandi tónlistar og glæsilegra veitinga.
