Líta þurfi alvarlegum augum á íbúaþróun
Berglind Ósk Guðmundsdóttir bæjarfulltrúi Sjálfstæðisflokksins segir að bæjaryfirvöld á Akureyri verði að líta á íbúaþróun í sveitarfélaginu mjög alvarlegum augum. Þar sé bærinn að missa af tækifærum. Á síðasta bæjarstjórnarfundi á Akureyri var umræða um samkeppnishæfni á atvinnumarkaði en Berglind Ósk hóf umræðuna. Reifaði hún nauðsyn þess að styrkja stöðu bæjarins á atvinnumarkaði og fjölga íbúum. Bæjarfulltrúar Sjálfstæðisflokksins lögðu í kjölfarið fram bókun þar sem óskað er eftir því að farið verði í vinnu við að gera samkeppnisgreiningu fyrir Akureyrarbæ til þess að nota til markaðssetningar á bænum, bæði á atvinnu- og íbúamarkaði.
Ráðast þarf í öfluga markaðssetningu
Berglind Ósk segir í samtali við Vikudag að bæjaryfirvöld þurfi að líta til þeirra þátta sem hafa áhrif á íbúa og þeirra sem líta til sveitarfélagsins sem búsetukost. „Hvar erum við að blómstra og hvar þurfum við að taka til? Það þarf að ráðast í öfluga markaðsetningu á þessum þáttum sem gera Akureyri að eftirsóknarverðum búsetukost,“ segir Berglind. Eins og fram hefur komið í blaðinu er hæg íbúafjölgun á Akureyri, Samkvæmt tölum úr Þjóðskrá Íslands var fjölgun í öllum landshlutum frá 1. desember 2017 til 1. október sl. nema á Norðurlandi eystra. Ef íbúafjölgun á Akureyri er skoðuð sérstaklega á milli áranna 2017 og 2018 þá fjölgaði bæjarbúum 92, eða 0,5% sem er töluvert undir landsmeðaltalinu.
Berglind Ósk Guðmundsdóttir
Segir álögur í hæstu hæðum
Berglind Ósk segir að áður en ráðist verður í öfluga markaðssetningu þurfi að greina sveitarfélagið út frá samkeppnishæfni þess við önnur sveitarfélög. „Greina þarf m.a. skilvirkni opinbera kerfisins og skilvirkni atvinnulífisins, bera saman álögur sveitarfélagsins við önnur og hafa þessar upplýsingar sýnilegar þeim sem eftir þeim óska, t.d. á heimasíðu sveitarfélagsins.“ Berglind segir ennfremur að í sveitarfélaginu séu álögur í hæstu hæðum en gert er ráð fyrir því í fjárhagsáætlun Akureyrarbæjar fyrir árin 2019-2022 að fasteignamat hækki annað árið í röð. „Það þýðir einfaldlega að með óbreyttri álagningu þá hækkar fasteignaskattur á heimili og fyrirtæki. Það er alveg ljóst að fyrirtæki og fjölskyldur líta til þessa þátta í þjónustu sveitarfélagsins og að þessar staðreyndir hafi neikvæð áhrif á val fólks um búsetu hér,“ segir Berglind Ósk.
Nýjast
-
FVSA kannar áhuga stéttarfélaga á Norðurlandi til sameiningar
„Þetta er hugmynd sem vert er að skoða og fróðlegt að sjá hver viðbrögð félaganna verða,“ segir Eiður Stefánsson, formaður Félags verslunar- og skrifstofufólks á Akureyri og nágrenni (FVSA). Nýlega sendi hann erindi til tíu stéttarfélaga á Norðurlandi til að kanna vilja þeirra til samtals um útfærslu á öflugu deildarskiptu stéttarfélagi á svæðinu. -
Reynsla mín af smíðakennslu á Akureyri. Aldarfjórðungur í baksýn.
Í Menntastefnu Akureyrarbæjar segir: „Verkviti er gert hátt undir höfði til þess að börn nái í síauknum mæli að tengja saman hug og hönd í skapandi umhverfi. Akureyrarbær hefur ríkan metnað til þess að í hverjum skóla starfi hæft og öflugt fólk og að eftirsóknarvert sé að starfa þar. Stuðningur skólayfirvalda við starfsþróun leikur þar stórt hlutverk“. Skipulag skóla gerir ráð fyrir samvinnu starfsfólks, sveigjanleika í skipulagi, teymiskennslu og samþættingu námsgreina“ (Menntastefna Akureyrarbæjar, 2020-2025). -
Örugg skref um allt land.
Heilbrigðiskerfið okkar er hjartað í því velferðarsamfélagi sem tekist hefur að byggja upp á Íslandi. Á yfir 40 fundum sem Samfylkingin bauð til um allt land til að ræða heilbrigðis- og öldrunarmál var ljóst að sinnuleysi og fyrirhyggjuskortur undanfarinna ríkisstjórna er að hola innan öryggistilfinningu fólks. Ekki síst í okkar kjördæmi þar sem vegalengdir eru langar, veður viðsjál og langt til Reykjavíkur. Að heilsugæslan neyðist til að reiða sig á íhlaupalækna til að bjarga vandanum tímabundið stoðar lítt. Það byggir ekki upp það traust og samfellu sem þarf til að fólk njóti þess margháttaða ávinnings sem rannsóknir hafa sýnt að fylgi því að hafa fastan heimilislækni. Enda settum við það sem okkar fyrsta heit í nýju framkvæmdaplani heilbrigðismála til tveggja kjörtímabila. Við erum tilbúin. -
Búsetutengd mismunun í heilbrigðisþjónustu, í boði einkavæðingar og heilbrigðisráðherra Framsóknar.
Búsetutengdur munur á notkun þjónustu sérgreinalækna er mjög mikill. Íbúar dreifbýlis nota þjónustuna mun minna en höfuðborgarbúar og íbúar Vestfjarða og Austfjarða minnst allra, nefnilega þrisvar sinnum minna en höfuðborgarbúar. Lýðheilsuvísar benda ekki til þess að íbúar í dreifbýli séu heilsubetri en höfuðborgarbúar. Nærtæk skýring á þessum mun er að kaupandi þjónustunnar, ríkið, lætur sig engu varða hvar þjónustan er veitt og hún hefur nær öll byggst upp í Reykjavík. Í versta falli er afleiðingin sú að þau sem búa næst þjónustunni nýta hana umfram þörf og hin sem fjær búa minna en æskilegt væri. Hvoru tveggja er hættulegt og brýnt að rýna lög og hvort þeim er fylgt. -
Svik við launafólk: Loforð um samráð brotin með gegndarlausum gjaldskrárhækkunum
Anna Júlíusdóttir formaður Einingar Iðju skrifar bréf til bæjarstjórnar Akureyrar í dag sem birt er að heimasíðu félagsins, það lætur hún í ljós mikla óánægju með boðaðar hækkanir hjá hinum ýmsu fyrirtækjum og stofnunum bæjarins og er óhætt að segja að Önnu sé misboðið. „Við erum tilbúin til uppbyggilegs samtals,“ sögðum við í júlí þegar bæjaryfirvöld á Akureyri boðuðu breytingar á gjaldskrám. Við fögnuðum loforðum um samráð, um víðtækt samtal við hagsmunaaðila og um reglulegt endurmatsferli þar sem allir kæmu að borðinu. Nú aðeins fjórum mánuðum síðar stendur eftir sársaukafullt svik á trausti launafólks. Í stað samtals og samráðs virðast vera að raungerast víðtækar gjaldskrárhækkanir sem eru hrein árás á kaupmátt launafólks. -
Vegamálin liggja þungt á Grímseyingum
Vegamál liggja þungt á heimamönnum í Grímsey. Bundið slitlag var sett á götur þar árið 1994 og aftur árið 2014, en þá var verkið ekki klárað almennilega, „því það mátti bara setja á ákveðið marga kílómetra,“ eins og það er orðað í bókun hverfisnefndar. -
Gripmælar, róbótar og ratleikur á Opnum degi Um 300 framhaldsskólanemendur lögðu leið sína í Háskólann á Akureyri
Stuðið var gífurlegt á dögunum þegar um 300 framhaldsskólanemendur heimsóttu Háskólann á Akureyri á Opnum degi. Skólinn hefur gert þetta í mörg ár í góðu samstarfi við náms- og starfsráðgjafa í framhaldsskólum á norðaustursvæðinu. -
Óska eftir frambjóðendum sem eru tilbúnir í alvöru breytingar!
Ég óska eftir breytingum svo að ég og allir aðrir menntaðir Heilsunuddarar viti hvað við eigum að kjósa í komandi alþingiskosningum. -
Lítið að frétta í lífi án frétta á landsbyggðunum
Af þeim 27 fjölmiðlum sem hlutu rekstrarstuðning til einkarekinna fjölmiðla 2024 voru 13 staðbundnir fjölmiðlar og af þeim 10 staðsettir utan höfuðborgarsvæðisins. Hver og einn af þessum staðbundnu miðlum þjónar gríðarlega mikilvægu hlutverki í sinni heimabyggð og styrkveitingin því sannarlega fagnaðarefni.
