Jólin upp í kok!
Kona á rúmlega miðjum aldri heyrði um daginn lag Baggalúts um konu sem helst vill tékka sig inn á hótel á aðfangadag. Aldrei áður hafði ég lagt mig fram um að hlusta á textann sem talaði beint til mín fyrir um tuttugu árum. Ef ég hefði heyrt hann þá er ekki ólíklegt að ég hefði pantað mér hótelherbergi um jólin.
Lagið er flutt af Siggu Beinteins sem túlkar það af snilld. Konan sem sungið er um er búin að fá nóg. Hún er “búin að öllu”, þrífa, kaupa í matinn, pakka inn draslinu og leggja á borð. En hún getur ekki meir enda búin að standa 3ju vaktina og vel það. Hún er komin með upp í kok!
Jólin eru ekki æði
Því miður er svo mikill sannleikur í þessum texta sem virðist hafa verið skrifaður af miklu innsæi.
Fyrir öllum þessum árum upplifði ég nákvæmleg það sem textinn segir. Var í fullri vinnu utan heimilis, með húsið fullt af stálpuðum strákum sem ég nennti ekki að eyða orku í að biðja um að hjálpa til, enda hefði sennilega síðasti bensíndropinn farið í það.
Á þessum tíma sleppti ég því þó að þrífa húsið hátt og lágt. Lét duga að baka vel af smákökum, kaupa og pakka inn jólagjöfum og skrifa jólakort, sem mér hefur reyndar aldrei þótt gaman og fagna því að flestir séu hættir því. Svo þurfti að ákveða hvað átti að vera í matinn alla dagana og skipuleggja öll innkaup. Til viðbótar við þetta héldu tvær stórfjölskyldur í þá hefð að skiptast á að bjóða heim um jólin svo þegar röðin kom að okkur bættist við stúss í kringum það. Og varla var maður búinn að pústa og draga andann þegar gamlárskvöld nálgaðist óðum.
Ég ætla að viðurkenna það hér og nú að í mörg ár, þjáðist ég af jólakvíða á háu stigi. Jólin voru ekki æði og mig langaði eins og Siggu Beinteins mest að fá mér sérrí og tjilla yfir góðum sjónvarpsþætti upp í sófa. Og þegar ég heyrði lagið á dögunum rifjaðist upp þessi vonda tilfinning að kvíða jólunum.
Það sem kannski er alvarlegast í þessu öllu er að ég þorði ekki fyrir mitt litla líf að tala um þetta og kvarta við neinn nema manninn minn sem reyndi eftir mætti að aðstoða en 3ju vaktina tók ég og hef alltaf gert. Í dag er þessi tími sem betur fer liðinn og ég nýt jólanna en mér verður stundum hugsað til þeirra sem í dag eru á sama stað í lífinu og ég var þarna.
Jólahittingar taka í pyngjuna
Sem betur fer held ég að enginn þrífi lengur út í horn en núna hafa aðrir þættir bæst við sem einhverjum þættu ekki íþyngjandi en það eru allir “jólahittingarnir” með vinkonum og vinum. Þeir taka ekki bara tíma heldur taka þeir líka í pyngjuna. Þessi hópur mætir auðvitað líka í cross-fit hálf sex á morgnana svo það náist að koma heim til að koma krökkunum í skólann.
Með þessum skrifum er ég ekki að kalla eftir samúð heldur vil ég vekja athygli á hversu erfiður þessi tími getur verið fyrir marga. Auðvitað væri óskandi að það hafi bara verið ég en því miður held ég að svo sé ekki.
Í ár verða jólin „löng“ vegna legu sinna í dagatalinu. Þreyttir foreldrar ná þá vonandi að hlaða batteríin en ég óska öllum gleðilegra og góðra jóla.
Nýjast
-
Mikill snjómokstur kallar á aukið fé
Umhverfis- og mannvirkjaráð Akureyrarbæjar hefur samþykkt að óska eftir viðauka við fjárhagsáætlun 2024 við liðinn snjómokstur og hálkuvarnir upp á 60 milljónir króna. -
Blanda af fjölbýlishúsum og sérbýlishúsum í Móahverfi
Akureyrarbær hefur samþykkt að auglýsa eftir kauptilboði í 25 einbýlis- og þrjár raðhúsalóðir í Móahverfi. -
Jólin upp í kok!
Kona á rúmlega miðjum aldri heyrði um daginn lag Baggalúts um konu sem helst vill tékka sig inn á hótel á aðfangadag. Aldrei áður hafði ég lagt mig fram um að hlusta á textann sem talaði beint til mín fyrir um tuttugu árum. Ef ég hefði heyrt hann þá er ekki ólíklegt að ég hefði pantað mér hótelherbergi um jólin. -
KEA kaupir eignasafn Íveru á Akureyri
Ívera íbúðafélag, áður Heimstaden, hefur gengið frá samningum við dótturfélag KEA um kaup hins síðarnefnda á um 120 íbúðum Íveru á Akureyri. Kaupverð eignanna er rúmir 5 milljarðar króna. Ívera hefur nýverið gefið út áform um tvöföldun á eignasafni sínu sem er í dag um 1.600 íbúðir. Sala eignanna á Akureyri er liður í endurskipulagningu eignasafnsins og styrkir undirstöður félagsins fyrir frekari vöxt. Í viðræðunum lögðu Ívera og KEA áherslu á áframhaldandi húsnæðisöryggi fyrir leigutaka íbúðanna en stefna KEA er að reka íbúðasafnið til langs tíma og stefnir félagið á frekari vöxt á þessu sviði. Því munu viðskiptin ekki að hafa neikvæð áhrif á núverandi leigutaka. Viðskiptin marka brotthvarf Íveru af íbúðamarkaði á Akureyri og félagið stefnir ekki á frekari umsvif þar í náinni framtíð. Stefnt er að afhendingu eignanna fyrir jól. --- -
Góð reynsla af símafríi
Góð reynsla hefur verið af símafríi í grunnskólum Akureyrarbæjar síðan símasáttmáli var innleiddur í upphafi skólaársins. Reglurnar kveða á um að símar eru ekki leyfðir á skólatíma, hvorki í skólanum né á skólalóðinni, en unglingastigið fær að nota síma í frímínútum á föstudögum. -
3,5 milljarða styrkur til að tryggja vatnsgæði á Íslandi
Umhverfisstofnun, ásamt 22 samstarfsaðilum, hefur hlotið um 3,5 milljarða króna styrk frá Evrópusambandinu til að vinna að fjölbreyttum verkefnum til að flýta fyrir og bæta innleiðingu vatnaáætlunar á Íslandi.Verkefnið ber yfirskriftina LIFE ICEWATER og er ætlað að: -
Slæm loftgæði í dag – unnið er að rykbindingu
Loftgæði á Akureyri eru slæm í dag vegna mikils svifryks, sem stafar af hægum vindi, stilltu veðri og mengun. Þau sem eru viðkvæm fyrir, svo sem aldrað fólk, börn og einstaklingar með viðkvæm öndunarfæri, eru hvött til að takmarka útivist og áreynslu, sérstaklega nálægt fjölförnum umferðargötum. -
Holllvinir SAk enn á ferð - Nýr hitakassi á barnadeild
Barnadeild Sjúkrahússins á Akureyri (SAk) hefur fengið nýjan og fullkominn hitakassa af gerðinni Babyleo frá Dräger. Kassinn leysir af hólmi eldri gerð sem komin var til ára sinna og ekki lengur hægt að fá varahluti í. Nýi hitakassinn er bæði notendavænn og auðveldur í umgengni og mun nýtast afar vel á hágæslu nýbura á barnadeildinni. Á deildina leggjast inn veikir nýburar og fyrirburar sem fæddir eru eftir 34 vikna meðgöngu og eru hitakassar lykilbúnaður í meðferð þeirra. -
Fyrstu önn Leiklistaskóla Draumaleikhúsins lokið
Fyrstu önn Leiklistarskóla Draumaleikhússins lauk um helgina með nemendasýningu í Deiglunni. Sýningin; Elísabet Scrooge - Alein á jólum var sýnd og var hún lokapunktur af 12 vikna námskeiði á 1.stigi.
