30. október - 6. nóember - Tbl 44
Félagar í Búsögu gera upp gömul útihús í Saurbæ
Það bætist jafnt og þétt í nýja sýningarsalinn. Myndir aðsendar
„Við stefnum á að opna sýningu í Saurbæ á næsta ári,“ segir Sigurður Steingrímsson formaður Búsögu, búnaðarsögusafns sem er félag áhugafólks um söfnun og varðveislu dráttarvéla og annarra tækja sem tilheyra búnaðarsögunni. Félagsmenn hafa unnið hörðum höndum að því að gera upp gömul útihús við Saurbæ í Eyjafjarðarsveit , m.a. fjárhús í því skyni að koma þar fyrir gömlum dráttarvélum til sýnis. Unnið var að kappi um liðna helgi að koma dráttarvélunum inn í nýja sýningarsalinn og létu sjálfboðaliðar hörkufrost ekki hafa mikil áhrif á vinnugleðina.
Sigurður segir að markmiðið sé að opna sýningu í Saurbæ á næsta ári sé ljóst að allt húsnæðið verði ekki tilbúið sem sýningarsvæði. Fjárhúsið, þ.e. það svæði þar sem dráttarvélarnar voru settar inn á um helgina er tilbúið. „Næsta verkefni er fjósið, sem er langt komið, en þar er stefnt á að setja upp sýningu sem hefur tengingu við kýr, mjaltir, meðferð mjólkur, flutninga og þróun á sviði mjólkurframleiðslu á síðustu öld,“ segir hann en Guðjón Samúelsson teiknaði fjósið á Saurbæ og var það byggt í kringum árið 1930. Hluti af steyptum innréttingum frá þeim tíma mun halda sér og verða hluti af sýningunni. Hlaðan er stærsta byggingin og segir Sigurður að þar verði í framtíðinni væntanlega sýning bæði á dráttarvélum og ýmsum tækjum og búnaði sem tengdur var við þær, bæði til jarðvinnslu og heyskapar.
Sýni þróun tækninnar við bústörfin
„Við höfum á okkar stefnuskrá til framtíðar litið að sýning Búsögu í Saurbæ muni sýna þróun á tækni við bústörf yfir síðustu öld. Þar munum við sennilega hafa eitt stykki af hverri gerð sem varpar ljósi á söguna,“ segir Sigurður og bætir við að félagið hafi notið velvilja Eyjafjarðarsveitar við verkefnið sem og verktaka í sveitarfélaginu vegna framkvæmda. Skútaberg hafi stutt félagið myndarlega þegar steypt var í gólfin. Tekjur félagsins koma af félagsgjöldum en stærstur hluti þeirra vegna sölu á dagatölum sem prýtt er með myndum og upplýsingum um gamlar vélar. Dagatölin er hægt að panta hjá Sigurði og á busaga@simnet.is.
Félagið Búsaga var stofnað árið 2011. Það hefur staðið fyrir fjölda sýninga á gömlum dráttarvélum og tók ávallt þátt í Handverkshátíð á Hrafnagili þegar hún var. Eins hafa félagar sett upp sýningar á Akureyri og tekið þátt í sýningu á Hvanneyri.
Húsin héldu hvorki vatni né vindi
Sigurður segir að mest orka félagsmanna fari í að græja húsin á Saurbæ, en félagið fékk aðstöðu þar eftir talsvert þref við ríkið sem á staðinn. „Það tók talsverðan tíma að komast inn í húsin með okkar gripi, það reyndist torsótt leið að fá þetta í gegn en hafðist að lokum,“ segir hann. Búsaga naut liðsinnis Eyjafjarðarsveitar og skipti það máli varðandi það að félagið fékk afnot af húsunum. „Það var gríðarlega mikilvægt fyrir okkur að fá húsin til afnota en vissulega var sá hængur á að þau héldu hvorki vatni né vindi. Það var því ljóst að gera þyrfti verulega endurbætur á húsnæðinu til að gera það sýningarhæft,“ segir Sigurður. Frá því samningur var undirritaður við Eyjafjarðarsveit árið 2016 hafa félagsmenn unnið markvisst við lagfæringar á húsnæðinu. Stærsta og umfangsmesta framkvæmdin var við þakið á hlöðunni sem var úr asbesti og víða illa farið, hlutar úr því voru farnir að dreifast um nánasta umhverfi.
Gott að fá heita kjösúpu á köldum degi í gamla eldhúsinu í Saurbæ. Frá vinstri, Pétur Jóhannsson, Bjarni Krisjánsson, Jón Jónsson, Jóhann Tryggvason, Hjörtur Haraldsson, Jóhannes Sigtryggsson og Húni Zophoníasson
Það er aldrei leiðinlegt hjá Búsögumönnum. Frá vinstri Jóhannes Sigtryggson Sigurður Steingrímsson Hjörtur Haraldsson Jónhann Tryggvason og Húni Zophoníasson
Nýjast
-
Geðverndarfélag Akureyrar fagnar 50 ára afmæli
„Geðverndarfélag Akureyrar hefur ekki verið mjög áberandi undanfarin ár, en á sér engu að síður merka sögu og hefur staðið fyrir mikilvægum framförum í geðheilbrigðismálum í bænum og ýmislegt sem til bóta er í þessum viðkvæma málaflokki,“ segir Valdís Eyja Pálsdóttir formaður Geðverndarfélags Akureyrar. Félagið var stofnað 15. desember árið 1974 og verður því 50 ára gamalt innan tíðar. Haldið verður upp á tímamótin næstkomandi laugardag. -
Verðandi sjávarútvegsfræðingar kynna sér starfsemi Samherja til sjós og lands
Hátt í fjörutíu nemendur í sjávarútvegsfræðum við Háskólann á Akureyri hafa á undanförnum dögum heimsótt skip og landvinnslu Samherja. Nemendur auðlindadeildar skólans hafa um langt árabil átt þess kost að skoða og kynnast starfsemi félagsins, sem hluta námsins. Magnús Víðisson brautarstjóri segir afar mikilvægt að öflug sjávarútvegsfyrirtæki séu starfandi í námunda við skólann, sem geri nemendum kleift að kynnast betur sjávarútvegi og haftengdri starfsemi. -
Aðeins fleira fé slátrað þetta haustið miðað við í fyrra
„Heilt yfir hefur gengið mjög vel, auðvitað hafa rafmagnstruflanir, nettruflanir, veðurtruflanir og ýmislegt af því tagi, stungið sér niður hjá okkur, en sem betur fer gekk allt upp að lokum,“ segir Sigmundur Hreiðarsson framleiðslustjóri Kjarnafæði Norðlenska á sláturhúsinu á Húsavík. -
Að þora að vera hræddur
Nú haustar og í haustmyrkrinu leynast oft myrkraverur og alls konar furðuleg fyrirbæri sem skjóta okkur stundum skelk í bringu. Flest tengjast þau reyndar hrekkjavöku og ýmiskonar skálduðum hryllingi þannig að það er lítið mál að sýna hugrekki og láta sem ekkert sé. Eða hvað, erum við kannski hræddari en við sýnumst, og hvenær erum við annars hugrökk? -
Ferðast landa á milli til að taka þátt í lotu Viðskiptadeildar
Í þarsíðustu viku var lota hjá Viðskiptadeild og þá gafst stúdentum tækifæri á að hitta kennara, samstúdenta og annað starfsfólk Háskólans. Þannig tengjast þeir betur innbyrðis og í lotum er horfið frá hefðbundinni kennslu, til dæmis með því að bjóða gestum úr atvinnulífinu að vera með innlegg í námskeiðum. -
Gefur lífinu aukalit og við hefðum alls ekki viljað missa af honum
„Rúben hefur verið okkur dýrmætur kennari í lífinu og gefið því fallegan auka lit. Við hefðum alls ekki vilja missa af honum,“ segir Arnheiður Gísladóttir móðir Rúbens Þeys, sem fæddist í janúar árið 2020, með Downs heilkenni. Október er mánuður vitundarvakningar um Downs heilkenni á alþjóðavísu. Einstaklingar sem fæðst hafa með heilkennið hafa fylgt mannkyni frá upphafi vega. Þeim fer fækkandi og um tíma hélt Arnheiður að Rúben Þeyr yrði með þeim síðustu hér á landi sem fæddist með heilkennið. Sú hafi þó ekki orðið raunin. Faðir Rúbens er Vífill Már Viktorsson smiður og átti Arnheiður fyrir Karítas Von sem verður 11 ára gömul í nóvember. Fjölskyldan býr á Akureyri. -
Flokkur fólksins er fyrir þig
Ég er þakklátur fyrir að vera sýnt það traust að fara fyrir frábærum frambjóðendum Flokks fólksins í Norðausturkjördæminu í komandi Alþingiskosningunum. Öll mín orka og þrek mun fara í að standa vörð um kjördæmið okkar. Flokkur fólksins hefur verið einarður málsvari landsbyggðarinnar og talað óhikað fyrir framtíð sjávarbyggðanna og jöfnun búsetuskilyrða. -
Hvaða þjónusta skiptir þig máli?
Maskína er um þessar mundir að gera þjónustukönnun fyrir hönd Byggðastofnunar meðal íbúa um land allt (utan höfuðborgarsvæðis) vegna rannsókna á þjónustusókn og væntingum til breytinga á þjónustu. -
Uppeldi á Íslandi í dagsins önn
Sigurbjörg Anna Þorleifsdóttir, stúdent í meistaranámi við Sálfræðideild, vinnur þessa dagana að meistaraverkefni sínu og rannsókn sem skoðar mismunandi uppeldisaðferðir í tengslum við hegðun barna á Íslandi. Dr. Hilal Sen, lektor við Sálfræðideild, er leiðbeinandi Sigurbjargar.
