20. nóvember - 27. nóvember - Tbl 47
„Boltinn er núna hjá þingmönnum“
Fulltrúar Norðurþings og stéttarfélagsins Framsýnar funduðu með fulltrúum flugfélagsins Ernis á mánudag til að ræða framtíð áætlunarflugs til Húsavíkur.
Upp er komin sú staða að mögulega hætti Ernir áætlunarflugi milli Húsavíkur og Reykjavíkur um næstu mánaðarmót eins og komið hefur fram en flugfélagið hefur haldið úti flugi á milli staðanna frá árinu 2012.
Aðalsteinn Á. Baldursson formaður Framsýnar segir í samtali við Vikublaðið að hann hafi vilja koma á fundi milli þerra aðila sem þetta mál snerti mest.
Kalla eftir ríkisaðstoð
„Það sem við ræddum var meðal annars það að flug á Íslandi er allt ríkisstyrkt nema flugið til Húsavíkur og það kemur fram hjá Erni að ef það á að halda þessu flugi gangandi þá þurfi að koma til stuðningur eins og með önnur flug,“ segir Aðalsteinn og bætir við að ekki megi gleyma því að einnig séu ríkisábyrgðir á ákveðnum flugleiðum í gegn um Icelandair.
„Þetta er ekkert flókið og þetta er það sem við erum að vinna í og kanna hvort þetta sé möguleiki og hvort stjórnvöld séu tilbúinn til þess að líta á þetta sem samgöngur fyrir okkur eins og aðra á Íslandi,“ segir hann og bendir á að Samkeppniseftirlitið hafi á sínum tíma haft áhyggjur af þessu þegar það skilaði inn skýrslu um ríkisstyrki eða ábyrgð í fluginu, að það gæti orðið til þess að minni félögin ættu erfitt. Að samkeppnisstaðan yrði skekkt. „Og það er allt komið fram. Maður veltir sér hvort að stjórnvöld ætli sér ekkert að gera með aðvaranir samkeppniseftirlitsins á sínum tíma.“
Funduðu með þingmönnum
Fulltrúar Norðurþings og Þingeyjarsveitar ásamt Aðalsteini fyrir hönd Framsýnar funduðu með nokkrum þingmönnum kjördæmisins á mánudagskvöld þar sem sjónarmiðum heimafólks var komið á framfæri.
„Við voru að leggja upp ákveðna áætlun um það hvort ekki sé hægt að koma að því að koma þessari flugleið inn í svipað kerfi og annars staðar á landinu. Flugleiðir til smærra staða á landinu eru ríkisstyrktar og við viljum komast inn í það kerfi enda mikilvæg samgöngubót fyrir okkur hér á svæðinu,“ segir Aðalsteinn og bætir við að ekki megi gleyma því að Húsavíkurflugvöllur þjónusti ekki aðeins Húsavíkinga heldur einnig íbúa alla leið austur á Þórshöfn.
„Niðurstaðan var sú að við lögðum upp með plan sem byggir á því að heimamenn taki á þessu máli með flugfélaginu og ríkinu en boltinn er núna hjá þingmönnum hvort þeir vilji vera með okkur í liði eða ekki.“
Hvorki bjartsýnn né svartsýnn
Aðalsteinn segir að ekki hafi fengist loforð frá þingmönnum en hann hafi þó fundið ákveðinn hljómgrunn og skilning. Hann treysti því að þingmenn leggist á árarnar.
„Svo eru ýmsir aðrir þræðir í pólitíkinni, einhverjir vilja eflaust sjá frekar meiri umferð í gegn um Vaðlaheiðargöng og efla flugið frá Akureyri. Þannig að ég er hvorki bjartsýnn eða svartsýnn en treysti því bara að unnið verði í þessu,“ segir Aðalsteinn en viðurkennir að margt verði að ganga upp ef flugið á ekki að leggjast af um mánaðarmót.
„Þetta er tvísýnt hvort flug heldur áfram um mánaðamót eða ekki. Málið er grafalvarlegt, ef það tekst ekki að finna einhverja framtíðarlausn þá verður ekkert flogið um Húsavíkurflugvöll eftir næstu mánaðamót,“ segir Aðalsteinn og bætir við að þetta snúist ekki aðeins um áætlunarflug.
„Þetta er líka flugvöllur sem sinnir sjúkraflugi. Það má ekki gleyma því að þetta snýst ekki aðeins um áætlunarflugið. Þetta snýst um framtíð flugvallarins og þar með sjúkraflugsins sem er okkur gríðarlega dýrmætt,“ segir Aðalsteinn að lokum.
Nýjast
-
Listasafnið á Akureyri: Opnun, fimmtudagskvöldið 28. nóvember
Fimmtudagskvöldið 28. nóvember kl. 20-22 verða opnaðar tvær sýningar í Listasafninu á Akureyri: Sólveig Baldursdóttir – Augnablik-til baka og Átthagamálverkið: Á ferð um Norðausturland liðinnar aldar. Boðið verður upp á sýningarstjóraspjall með Markúsi Þór Andréssyni, sýningarstjóra Átthagamálverksins, kl. 20.40 og listamannaspjall með Sólveigu kl. 21. -
Íslandsþari með ný áform um þaravinnslu á Húsavík
Íslandsþari óskar eftir að fá úthlutað lóðinni að Búðarfjöru 1 á Húsavík til uppbyggingar húsnæðis til úrvinnslu stórþara. -
Betra veður fyrir íþróttakrakkana okkar!
Á ferð minni um okkar víðfema og fallega kjördæmi hef ég lent í allskyns vandræðum í öllum veðrum nú í nóvember. Ég er sannarlega ekki einn um það enda vegir landsins uppfullir af spennandi frambjóðendum í leit að sem flestum samtölum við fólkið í landinu. Frambjóðendur keppast nú við að birta myndir og myndbönd af skafrenningi, snjókomu, blindbyljum og fleira til. Allt til þess gert að sýna fólki hversu vandasamt það getur verið að ferðast um landið í nóvember. Sem betur fer er bara kosið á fjögurra ára fresti og oftast á vorin. Þess vegna er þetta nú frekar undantekning en hitt að frambjóðendur þurfi að vaða út í þetta veður og þessa færð í atkvæðaleit. -
Nærsamfélagið tekur höndum saman
Jólatónleikar til styrktar Sigrúnu Björgu Aðalgeirsdóttur og fjölskyldu -
Jólamatur fátæka mannsins
Einn af mínum allra uppáhalds fuglum er rjúpan. Rjúpan nam hér land við lok ísaldar fyrir um 10.000 árum og kom upprunalega frá Grænlandi. Hún á sér lengri forsögu hér en við. Mér finnst hún ekki bara falleg, hún er brögðótt, á 3 alklæðnaði og þegar hún ver unga sína, þá sýnir hún vanmetna vitsmuni. -
Hver grípur þig?
„Við vildum að fólk gerði sér grein fyrir hvaða þjónusta er í boði og hvert er hægt að sækja hana þegar aðstoðar er þörf, fólki að kostnaðarlausu. Einnig langar okkur með málþinginu að styrkja samstarfið á milli félaganna, að fulltrúar þeirra séu upplýst um aðra kosti sem eru í boði fyrir fólk og geti bent málum í réttan farveg eða til viðeigandi félagasamtaka,“ segir Erla Lind Friðriksdóttir um málþing sem hún stendur fyrir ásamt frænku sinni Birnu Guðrúnu Árnadóttur. -
Sérútbúinn lögreglubíll til landamæraeftirlits
Embætti Lögreglunnar á Norðurlandi eystra hefur fengið til eignar sérútbúinn lögreglubíl til afnota við landamæraeftirlit. Segja má að þar sé á ferðinni fullbúin landamærastöð á hjólum. Landamæra- og áritunarsjóður Evrópusambandsins greiddi 75% kostnaðar og Dómsmálaráðuneytið 25% og skiptu einnig með sér kostnaði við einn starfsmann í þrjá mánuði síðastliðið sumar. -
Klúbbar styrkja Frú Ragnheiði
Klúbbarnir Ladies Circle 7 og Round Table 15 afhentu Frú Ragnheiði rausnarlegar styrk í vikunni, ómetnalegur styrkur . „Við erum svo innilega þakklát og mun þetta nýtast skjólstæðingum okkar vel segir í tilkynningu, en styrkurinn er að upphæð um 630 þúsund krónur. -
Gjaldfrjáls leikskóli dregur úr álagi og bætir líðan barna
Gjaldfrjáls leikskóli hefur reynst áhrifarík leið til að draga úr álagi í leikskólum, á skólastjórnendur og starfsfólk og hefur jákvæð áhrif á börnin.
