20. nóvember - 27. nóvember - Tbl 47
Þroskaþjálfar
Skógarlundur
Þroskaþjálfar eru fagstétt sem sérstaklega hefur menntað sig til starfa með fólki á öllum aldri með langvarandi stuðningsþarfir. Hugmyndafræði stéttarinnar byggist á virðingu fyrir mannréttindum, frelsi og sjálfsákvörðunarrétti. Þroskaþjálfafræði er fjögurra ára háskólanám og kennt við Háskóla Íslands. Námið byggir á félagslegum skilningi á fötlun, margbreytileika og óendanlegu verðmæti hverrar manneskju. Meðal viðfangsefna í náminu eru: Þroskaþjálfafræði, fötlunarfræði, þroskasálfræði, siðfræði, óhefðbundnar tjáskiptaleiðir, fjölskyldur og samvinna, forysta og heildræn þjónusta og mannréttindi.
Hlutverk þroskaþjálfa hefur ætíð verið að stuðla að velferð fatlaðs fólks, fyrst í formi þjálfunar og umönnunar en nú einnig í formi þess að styðja við og stuðla að sjálfstæðu lífi og fullri samfélagsþátttöku.
Þroskaþjálfafélag Íslands telur mikilvægt að þeir sem stýra og bera ábyrgð á þjónustu við fólk með langvarandi stuðningsþarfir hafi menntun, þekkingu og reynslu við hæfi. Gæði þjónustunnar ræðst af skipulagi hennar, stýringu og framkvæmd. Þroskaþjálfar eru eina fagstéttin sem sérstaklega hefur menntað sig til þess að starfa með fólki með fötlun. Þeir hafa víðtæka og hagnýta þekkingu, annars vegar á sviði stefnumótunar, skipulags og framkvæmdar heildrænnar þjónustu og hins vegar á persónumiðaðrar þjónustu óháð aldri og aðstæðum fólks. Þroskaþjálfafélag Íslands telur að hlutfall fagmenntaðra starfsmanna haldist í hendur við gæði þjónustunnar sem verið er að veita.
Í Skógarlundi, miðstöð virkni og hæfingar starfa fimm þroskaþjálfar. Þeirra lykilhlutverk, ásamt öðrum starfsmönnum í Skógarlundi er stuðningur, leiðsögn, umönnun og aðstoð við þá sem nýta þjónustuna. Verkefnin eru breytileg eftir þörfum og óskum hvers og eins og leitast er við að mæta þörfum fólks og skapa aðstæður til að það hafi frelsi til að taka eigin ákvarðanir. Starfsemi Skógarlundar fer fram á níu starfsstöðvum og verkefni hverrar starfsstöðvar eru skýr og skipulögð. Markmiðið með starfsstöðvunum er að bjóða upp á fjölbreyttari vinnu og virkni fyrir alla. Allir sem koma í Skógarlund vinna á tveimur starfsstöðvum á dag og verkefnin eru aðlöguð að hverjum og einum.
Störf þroskaþjálfa í Skógarlundi felast m.a. í ;
• að skipuleggja og bjóða upp á einstaklingsmiðaða, heildstæða og sveigjanlega þjónustu
• að hafa yfirsýn og halda utan um þætti sem varða velferð og hagsmuni allra þeirra sem koma í Skógarlund
• að þjálfa og efla færni í daglegu lífi
• að vinna eftir hugmyndafræði um þjónandi leiðsögn
• að aðlaga verkefnin á hverri starfsstöð þannig að sem flestir geti nýtt sér þau
• að þekkja þau hjálpartæki og þann búnað sem til er og geta nýtt hann til að auka lífsgæði og þátttöku
• að mæta fólki þar sem það er statt varðandi vinnu / virkni, samskipti og í félagslegum aðstæðum
• að geta nýtt sér hugmyndafræði TEACCH um skipulögð vinnubrögð
• að þekkja óhefðbundnar tjáskiptaleiðir og geta fundið þær leiðir sem henta hverjum og einum best
• að efla og styrkja sjálfsákvörðunarrétt og val
• að gera persónubundnar þjónustuáætlanir
• að stuðla að þátttöku í samfélaginu
• að veita öðrum starfsmönnum stuðning og leiðsögn.
Við þroskaþjálfar í Skógarlundi teljum mikilvægt að auka hlutfall þroskaþjálfa í störfum þar sem einstaklingar með langvarandi stuðningsþarfir þurfa á þjónustu að halda. Samvinna fagstétta er mikilvæg og í Skógarlundi starfa einnig iðjuþjálfar, félagsliðar, íþróttafræðingur, starfsmaður með BA í sálfræði og aðrir reyndir starfsmenn. Besta mögulega lausnin fæst alltaf þegar allir leggja sína þekkingu á vogarskálarnar og þannig teljum við að við mætum þörfum þeirra sem koma í Skógarlund best.
Í greininni er stuðst við upplýsingar frá HÍ, starfskenningu þroskaþjálfa, yfirlýsingu þroskaþjálfafélagsins og starfslýsingum þroskaþjálfa í Skógarlundi.
Unnið af:
Berglindi Hörpu, Emblu Rún, Ester, Lilju Birnu og Ragnheiði, þroskaþjálfum í Skógarlundi, miðstöð virkni og hæfingar á Akureyri.
Nýjast
-
Eignarhald bænda á jörðum tryggir hag þeirra best
Umræða um jarðir, jarðaviðskipti og kynslóðaskipti í landbúnaði er og á að vera fyrirferðarmikil í umræðu um stöðu sveitanna. Enda var málefnið eitt helsta umræðuefni á haustfundum Bændasamtaka Íslands. Uppkaup og jarðasöfnun fjárfesta og samkeppnisstöðu landbúnaðar. Um stöðu ungra bænda og eldri bænda sem væru að afhenda bú sín til yngri kynslóða. -
Orkumál
Alþingiskosningar ber brátt að garði. Þar skipar undirrituð 2. sætið á lista VG í norðausturkjördæmi. Ég bý á Björgum í Kinn í Þingeyjarsýslu þar sem systir mín og ég tókum við búi 2017 af foreldrum okkar. Þar er mjólkurframleiðsla, umfangsmikil jarðrækt, kornrækt og örfáar kindur.Meðal starfa minna í félagsmálum má nefna formennsku í Samtökum ungra bænda og þá hef ég setið í sveitarstjórn Þingeyjarsveitar frá árinu 2018 og er nú formaður byggðarráðs -
Þakklæti er varla nægilega sterkt lýsingarorð
„Ég þurfti að gera hlé á máli mínu því tárin bara runnu niður kinnarnar,“ segir Marta Kristín Rósudóttir verkefnastjóri hjá Krabbameinsfélagi Akureyrar og nágrennis. Dekurdagar afhentu félaginu alls 6, 7 milljónir króna og hefur upphæðin aldrei verið hærri en nú. Frá árinu 2012 hafa Dekurdagar safnað 37.850.000 kr. fyrir Krabbameinsfélag Akureyrar -
Fjórtándi jólasveinninn hjá Freyvangsleikhúsinu
Fjórtándi jólasveinninn er frumsamið jólaverk eftir Ásgeir Ólafsson Lie sem segir sögu af hinum hefðbundnu jólasveinunum 13 sem og Grýlu, Leppalúða og jólakettinum. Nema í þessu leikverki eru jólasveinarnir ekki bara þrettán heldur er þarna sá fjórtándi sem enginn átti von á. Leikritið verður frumsýnt hjá Freyvangsleikhúsinu á laugardag, 23. nóvember og verður sýnt á aðventunni. -
Dásamlegt og gefandi að starfa í kvenfélagi
„Það er dásamlegt að starfa í kvenfélagi. Þetta er yndislegur félagsskapur, gefandi á allan hátt. Við skemmtum okkur vel, látum gott af okkur leiða en vinnum okkar verk yfirleitt í hljóði og erum ekki að auglýsa það sérstaklega þó við gerum góðverk,“ segir Auður Thorberg formaður Kvenfélagsins Hjálparinnar í Eyjafjarðarsveit. -
Mikil ásókn í íbúðir á vegum Bjargs á Húsavík
Óhætt er að segja að mikill áhugi sé á íbúðum sem Bjarg íbúðafélag er að byggja á Húsavík í samstarfi við Norðurþing, en þetta kemur fram á heimasíðu Framsýnar í dag. -
Litlu jólin á sjó!
Áralöng hefð er fyrir því að áhafnir fiskiskipa Samherja haldi litlu jól í aðdraganda jólanna. Kokkarnir töfra þá fram hverja kræsinguna af annarri. Litlu jól áhafna Kaldbaks og Snæfells voru haldin hátíðleg á dögunum. -
Boðað verkfall lækna mun hafa áhrif á þjónustu SAk.
Félagsmenn í Læknafélagi Íslands hafa samþykkt verkfallsboðun og hafi ekki samist skellur boðað verkfall lækna á eftir nokkra daga eða um miðnætti aðfaranótt mánudagsins 25. nóvember n.k. -
Hvítasunnukirkjan styrkir Hollvinasamtök
Hollvinasamtök Sjúkrahússins á Akureyri fengu afhentan rausnarlegan peningastyrk frá Hvítasunnusöfnuðinum, alls 800 þúsund krónur nýverið.
