Nauðsynlegt að fjárframlög verði aukin til að tryggja aðgengi að öruggri heilbrigðisþjónustu
„Áskoranir og sóknarfæri“ var yfirskrift ársfundar Sjúkrahússins á Akureyri (SAk), sem fram fór í dag. Þar kom fram að rekstur á árinu 2021 hafi verið markaður af baráttunni við Covid-19 faraldurinn sem hafði margvísleg áhrif á starfsemina. Þrátt fyrir það hafi orðið mikil aukning á ýmsum sviðum starfseminnar frá árinu áður.
Hildigunnur Svavarsdóttir, forstjóri sjúkrahússins, segir nauðsynlegt að fjárframlög verði aukin til að tryggja aðgengi að öruggri heilbrigðisþjónustu í samfélaginu; en SAk var rekið með 146,9 milljóna króna halla á síðasta ári.
Þá greindi Hildigunnur frá því að áhrif á starfsemina hafi verið greinileg þegar toppar komu í Covid-faraldurinn. Þá hafi orðið röskun á starfsemi dag- og göngudeilda, frestun valaðgerða á skurðstofum með óhjákvæmilegum áhrifum á lengingu biðlista og biðtíma. Hins vegar hafi almennt gengið vel að veita nauðsynlega bráðaþjónustu, þrátt fyrir gríðarlega mikið álag á starfsfólk SAk.
Mikilvægt að halda áfram að efla þjónustuna
Þá kom fram á fundinum að laun og launatengd gjöld sjúkrahússins voru 8.454,7 milljónir og hækkuðu um 751 milljón á milli ára. Alls störfuðu 960 einstaklingar við sjúkrahúsið, sjö fleiri en árið áður.
Karlar voru 170 og konur 790. Setnar stöður voru að meðaltali 561,6 og fjölgaði um 44,4 stöður á milli ára og kemur sú aukning helst vegna breytinga sem tengjast betri vinnutíma vaktavinnufólks.
Árslaun á hverja stöðu voru að meðaltali 12 m.kr. Önnur gjöld, fyrir utan laun og afskriftir, námu 2.735,6 m.kr.
Heildarútgjöld vegna reksturs hækkuðu um 14,4 prósent á milli ára og voru 11.190 milljónir króna samanborið við rúmar 9.785 milljónir árið áður. Rekstrarniðurstaða ársins var neikvæð um 146,9 milljónir króna, sem fyrr segir.
„Rekstur sjúkrahússins er mikil áskorun. Halli hefur verið á rekstrinum og snúa þarf þeirri þróun við. Á sama tíma er mikilvægt að halda áfram að efla þjónustuna við íbúa samfélagsins, í takt við þarfir þeirra. Því er nauðsynlegt að fjárframlög verði aukin til að tryggja aðgengi að öruggri heilbrigðisþjónustu í samfélaginu,“ sagði Hildigunnur.
Heilbrigðisstofnun í fremstu röð
Hildigunnur, sem skipuð var forstjóri SAk frá og með 1. september 2021, sagði í ræðu sinni á fundinum að það mikla starf sem unnið var á SAk á liðnu ári hafi styrkt sjúkrahúsið enn frekar í sessi sem heilbrigðisstofnun í fremstu röð.
Hildigunnur kynnti ennfremur endurskoðaða stefnu sjúkrahússins til ársins 2027. Hún sagði við það tækifæri að margar áskoranir væru framundan, m.a. varðandi þjónustu, rekstur og mönnun. „Við stöndum áfram sem „SAk fyrir samfélagið“ og ætlum okkur að verða leiðandi á sviði sérhæfðrar heilbrigðisþjónustu á landsbyggðinni og öflugur vettvangur kennslu og rannsókna á heilbrigðissviði,“ sagði hún.
Nýjast
-
Opnar dyr í Eyjafjarðarsveit
Ferðamálafélag Eyjafjarðarsveitar stendur fyrir viðburði sem nefnist Opnar dyr á laugardag, 30.nóvember og nú í fimmta sinn. Markmiðið með þessum viðburði er að kynna þá starfsemi sem er í sveitinni og bjóða uppá tækifæri til að versla beint við framleiðendur og fyrirtæki. -
Hollvinir SAk gefa öndunarmælingatæki
Hollvinasamtök Sjúkrahússins á Akureyri (SAk) gáfu rannsóknarstofu lífeðlisfræðideildar SAk á dögunum nýtt öndunarmælingartæki, tækið nýtist við greiningu, meðferð og eftirlit lungnasjúkdóma Nýja tækið (Vintus One) gefur möguleika á mismunandi tegundum öndunarmælinga, s.s. fráblástursmælingu, loftdreifiprófi, mælingu á rúmmáli lungna og sveiflumælingu. -
Að kjósa annað en Framsókn er að kjósa kyrrstöðu eða afturför í heilbrigðismálum.
Frá árinu 2022 og til 2023 fjölgaði valkvæðum liðskiptaaðgerðum á Íslandi um rúmlega átta hundruð aðgerðir. Meðal tíminn sem að hver sjúklingur þurfti að eyða á biðlista var yfir níu mánuðir. Það er því í raun vel skiljanlegt að þessir biðlistar hafi lengst til mikilla muna vegna einfaldlega hinnar gríðarlegu fjölgunar á liðskiptaaðgerðum. -
Tími til að gleðjast með fjölskyldunni
Aðventuhátíðin Jólabærinn minn á Húsavík -
Njál Trausta áfram sem þingmann okkar í Norðausturkjördæmi
Njáll Trausti Friðbertsson er í baráttusæti Sjálfstæðisflokksins í þeim tvísýnu þingkosningum sem framundan eru. -
Að kjósa taktískt
Komið er að lok kosningabaráttu sem hefur í senn verið áhugaverð og skemmtileg. -
Stefnir í litaðar viðvaranir i veðrinu
Óhætt er að fullyrða að það hvernig veður skipast í lofti næstu daga muni hafa áhrif hvernig tekst til við við framkvæmd Alþingiskosninga, en óhætt er að segja að blikur séu á lofti. -
Alþingiskosningar, laugardaginn 30. nóvember 2024
Kjörstaðir í Akureyrarbæ eru í Verkmenntaskólanum á Akureyri, í Hríseyjarskóla og í Félagsheimilinu Múla í Grímsey. Akureyrarbæ er skipt í 13 kjördeildir, 11 á Akureyri, ein í Hrísey og ein í Grímsey. Skipting kjósenda í kjördeildir fer eftir búsetu samkvæmt skráðu lögheimili hjá Þjóðskrá þann 29. október kl. 12:00 og eru kjósendur beðnir um að kynna sér í hvaða kjördeild þeim ber að kjósa. Hægt er að fletta upp í kjörskrá á vef Þjóðskrár á slóðinni: www.kosning.is. Kjörfundur hefst kl. 9:00 og lýkur eigi síðar en klukkan 22:00. -
Frozen hátíðardanssýning Steps Dancecenter í Hofi 30. nóvember
Steps Dancecenter á Akureyri býður íbúa og gesti bæjarins velkomna í sannkallað dansævintýri þann 30. nóvember, þegar nemendur skólans stíga á svið í Hofi með glæsilega hátíðarsýningu með ævintýrið Frozen.
