Vikublaðið Þeyr | Grundarfjörður | Snæfellsnes

Um næstu helgi má búast við að bæjarmynd Grundarfjarðar taki á sig öðruvísi mynd þegar til fjarðarins fagra skunda atvinnu- og áhugakvikmyndagerðarmenn og konur og deila hugðarefnum sínum meðal okkar almúgans. Eins og auglýst er hér í blaðinu er blásið til þriðju alþjóðlegu stuttmyndahátíðarinnar hér í Grundarfirði og má búast við að helgin verði hin áhugaverðasta. Dögg Mósesdóttir, grundfirks kvikmyndagerðarkona á heiður og höfuð í skipulagningu hátíðarinnar í ár eins og fyrri ár og eins og sagt er á vefsíðu hátíðarinnar berst hróður hennar víða og má búast við að margt sé forvitnilegt að sjá og upplifa um næstu helgi.  Eins og áður sagði er þetta í þriðja sinn sem hátíðin er haldin í Grundarfirði og má búast við að bæinn heimsæki fjöldi áhugaverðra gesta sem hafa frá mörgu og merkilegu að segja og deila með okkur bæjarbúum. Í fyrsta skiptið í sögunni er svo á laugardagskvöldið haldin sjávarréttasúpukeppni meðal íbúa bæjarins og eru gestir og gangandi smakkarar og dómnefnd.  Það er um að gera að skoða vel dagskrána og fjölmenna á þessa glæsilegu hátíð sem hefur sett sinn brag á vetrarmánuðina við Grundarfjörð sl ár.  hj